26

Zauberhuus-Magie

Samschtig Obe: Liecht ahgheiteret, om mech ome gueti Frönde, alti Bekannti ond jongi Wöudi. Mine Bleck gleitet dör d Zone 5 ond bliibt plötzlech bi der hange.

Onschinbar stohsch du öberem Igang vo eusem gschätzte Deheime, de Trese ond s’bonte Triibe rond om de Bondesplatz hesch emmer fescht im Bleck. Dine Mantel us Staub esch je noch Motivation vom Potzpersonal mou meh oder weniger deck. Das scho chli id Johr cho besch gsehd mer der mettlerwiile scho es betzeli ah. Trotz allem strahlet niemer so schön wie du i die donkli Nacht vo Lozärn. Gmeint esch natürli s alte FCL Logo öberem Zoneihgang. Aber fömmer doch mou vo vore ah.

Ufgstellt worde besch du zersch imene Fan-Shop i de Stadt, bevor du de im altehrwödige Stadion Allmend glandet besch. Dete hesch dini Jöhrli verbrocht bis d’Bagger ufgfahre send. Wahrschindli wärsch ou du im Abress zom Opfer gfalle, hätted dech ned zwöi jongi muetigi Männer inere Nacht ond Näbel Aktion grettet, met vöu Liebi restauriert ond i eusem gliebte zwöite Deheime platziert. Sit rond 11 Johr verbrengsch jetz dini Täg i de Zone 5.

Weder zrogg zom besagte Samschtig Obe. Die erschte Kollege lueged scho kritisch wöui mine Bleck nömme cha abwände ond dänked scho dra es Mineral för mech z’bstöue. Aber mech entressiert nor ei Frog: Wenn du ei Gschecht chönntisch verzöue, vo was wördsch mer brechte?

Wördsch mer vo de Stemmig nochemene Heimsieg verzöue, wenn alli luuthals zo de Songs vom DJ Matula fiired? Wärs ächt d’Gselligkeit vom jöhrleche Jasstornier wo sech Jong ond Alt zom gmeinsame Chartespel trefft oder doch eher vom Bingo inklusive Hammerpriise? Oder öber all die kulinarsche Höheflög, vo BOF öber Hot Dogs ond Grillade zo de ufwändigschte ond chöstlechschte Gourmet Rezäpt?

Velecht aber au vo de musikalische Virtuose, wo im Lauf vo de Ziit die chli Böhni bespöut hend? Chranki Partys met Musig-Grössene vom Peter Wackel bis zom Mimiks, aber ou jonge Bands wo no im Starthüüsli vonere wöude Rock ‘n’ Roll Karriere schtönd, hesch du scho döffe meterläbe. Es absoluts Highlight send ou alli Irisch Bands wo im Louf vo de Ziit d Zone ines Tollhuus hend lo verwandle ond d Lüüt komplett hend loh eskaliere. Zone ond Enselaffe met Instromänt, das passt eifach.

Erwähne wördsch velecht aber au de Zämehalt wo herrscht, wemmer sech nochere bettere Nederlag gmeinsam therapiert ond zäme weder ufrafft. Velecht wärs ou komplett öppis anders, wie wenn öpper es Buech vorstellt, e Kino Obe stattfendet oder sech am Mettwoch Nomitag es paar Ragazzis zom Fahnebastle träffed.

Langsam löst sech mine Bleck vo der ond ech loh mer mini Gedanke no einisch Revue passiere. All das wo mer i dere chorze Ziit dör de Chopf gschosse esch send jo nome Brochteil vo dem wo du bis jetz hesch chönne beobachte. Es gäb secher no onzähligi anderi Anekdote wod chönntisch verzöue. Es gäb no verschedensti Aktivitäte ond onzähligi anderi Ereignis wo sech i dem Lokal vo de FCL Fans abgspöut hend. Das ganze Triibe of de Allmänd, wo jo ou meterläbt hesch, lömmer jetz mou of de Siite. Das wörd de Rahme definitiv spränge.

Weli Gschecht das mer wördsch verzöue hani mer leider ned chönne usmole, för das geds eifach z vöu. Ech be mer aber secher es wär e Story wo de Keith Richards vor Niid wörd erblasse. Im Momänt grad lüüchtisch nömme so vöu, aber ech freue mech scho jetz druf, liecht z ahgheiteret am Trese z hocke ond met üüch öber vergangni Gschechte z rede ond neui afo schriibe!

Verfasst von: RHP

Mitdiskutieren
Zurück zur Übersicht